Osom limau
Osom limau atau oron saintifik ni Citrus microcarpa lekat ta' keluarga Rutaceae, jinis poon tena'. Jomo Sama bioso ni nonom osom limau tu ta, sedi ruma'. Eko guno ni osom limau tu ta, diam masayarakat Bajau Sama terutama ni diom makanan. Masyarakat Malaysia minat makay osom limau ta' diam makanan ko minuman. Jadi eko pasaran untuk osom limau tu, ta' Malaysia. Rego ni ta' pasar lebih kurang RM4.50 dekilo samapai RM6.50 dekilo. Jomo petani bule' nu nonom osom tu ta' diam kabun untuk nambah sumber pendapatan segay.
Osom limau tu sanang tomo'. Yoo bule' tomo' ta' eko jenis tana', tapi tana' yang paling geroton ni yo nu, tana' bengen ungus. Lagi pan iklim ta' Malaysia tu sangat sesuai untuk osom limau. Poon osom liau bule tenonom lekat ta' bigi atau pan makai poon kenawin. Bioso ni jomo nonom makay bigi, tapi amun tujuan untuk kabun, petani akan makai bibit kawin. Osom limau tu pan bule tenonom diom pasu bungo. Sebelum nonom, mesti sedio tana' campuran makay tana, tea' manuk ko tana' ungus. Campuran tu genuul semimon. Tana' campuran tu pinosok ta' diom pasu. Bibit osom limau bule nu tenonom tarus ta' diom pasu. Bioso ni amun tonom ta' kabun atau ta' jata' tana', mesti sedio lubang untuk nonom berukuran 60cm langkau x 60cm lebar x 60 cm lolom. Jarak dempoon ko' dempoon osom limau amun tenonom jata' tana' yo ni 6m x 6m. Jarak nonom mesti bana' supaya poon osom limau nia' serebut makanan, bue' ko moto elau.
Masa ni poyo, osom limau tu perlu eko bue' tapi poon osom liau nia' bule' nerondom diom bue. Poon osom limau anu bau' tenonom mesti ni seniram menduo dembay. Dembila' sensaung ko' dembila' kemuap. untuk kule' hasil bua' osom liau yang alap, engo-engo ingos anu bean penyakit, mesti teniman. Masa poon limau masi diki', rumput anu tomo' ta' sedi poon limau mesti teniman makai tangan atau pan makai sangkul. Amun ai nu poon limau oyo, maka bule nu makai rasun rumput untuk ngerasun rumput. Perlu pan makai baja tenomon untuk kule' poon osom limau yang lawa' ko' hasil bua' osom limau yang alap. Baja bioso ni penakay masa poon limau diki yo ni Baja urea 50g/poon. Tenomon osom limau diom pasu makay baja urea 20g/pasu. Tea' manuk keroi 50Kg/poon, penakay masa umur poon osom limau ai nu lebi dari dentahun. Pembajaan binuat menduo dentahun.
Serangga anu bioso mengkeraat poon ko bua' osom liamu yo ni kutu trip, langau bua', pelombong duun, kepinding namuk ko pengurik bua'. Serangga tu bule kenawal makai rasun Malathion. Kebersihan kabun pan mesti nejogon.
Osom limau tenonom makay bibit kawin, bioso ni, mula melua' bua' amun umur ni ai nu teko duo - telu taun. Asil bua' osom limau tu nia' somo dempoon ko dempoon, tapi bioso ni, asil tarus menik. Poon osom limau tu alap pan tenonom ko niusa' palap-palap, sebab pasaran ni iko ko' langa. Diom pandangan ku, osom limau tu alap niusa' kerana nia dangay perlu iko sin penakay. Lagi pan hasil bua' osom limau tu makin menik tiap dentahun. Iko bana'untung ni diom masa langkau.